Ottomma diwettha dornskrif an awtour a-vri, Edgar Allan Poe. Ny veu gorfennys kyns ev dhe verwel.
An Golowji
Gen 1 - 1796. An jydh ma - ow hensa y’n golowji - my a skrif an merkyans ma y’m dydhlyver, avel yth esa agriys gans De Grät. Mar venowgh avel my a yll skrifa’n journal, my a wra - mes nyns eus fordh a leverel pandr’a alsa hwarvos dhe dhen mar dhigoweth kepar ha vyvy - martesen my a glafha, po gweth … Da bys dhe lemmyn! Yth esa skapyans ogas dhe’n skavskath - mes prag gortos gans henna, drefen my dhe vos omma, yn tien salow? Yma’m spyryrsyon ow talleth dasserghi seulabrys, orth an tybyans sempel a vos - rag unweyth y’m bewnans dhe’n lyha - yn tien digoweth; rag, heb mar, nyns yw Nevyon, mar vras avel y fo, dhe vos prederys avel “kowethas”. A-barth Nevow mar hwrussen vy byth trovya yn “kowethas” unn hanter a gemmys fydh hag y’n ki truan ma: - yn kas an par na martesen ny wrussa “kowethas” ha vy byth diberthi - hogen rag bledhen ……. An dra a’m sodhan an mogha, yw an kaletter esa gans De Grät orth kavos an apoyntyans ragov - ha vyvy marghek nobyl an wlaskor! Ny alsa bos bos gans lys an gussulyoryon neb dout y’m gallos dhe dhyghtya’n golow. Unn den re’n attendsa kyns lemmyn - ha seweni yn mar dha avel an tri usi gorrys ynno dell yw usys. Yn sempel yma’n dever travyth; hag yma’ danvonadow pryntyes mar apert avel possybyl. Byth ny via gwiw dhe asa Orndoff dhe vos war-barth ha vy. Ny vynnsen vy avonsya vytholl gans ow lyver kehys ha’y vos a-berth yn ystyn ahanav vy, gans y flows ansoffradow - heb gul mencyon a’n ewon mor bythbesus. Dres henna, my a vynn bos digoweth …… Yth yw revedh na wrug vy merkya, bys dhe’n pols ma, py mar sogh yw son an ger na - “digoweth”! My a alsa hanter-brederi bos neb koyntdra yn dasson an fosow hirgren - mes ogh, na! - flows dien yw hemma. Krysi a wrav my dhe vos nervus a-dro dhe’m enesegans. Nyns yw henna gwiw. Ny wrug vy ankevi dargan De Grät. Lemmyn dhe skrambla dhe’n lugarn ha mires a-dro rag “gweles pandr’a allav vy gweles” …………. Gweles pandr’a allav vy gweles yn tevri! - na meur. Yma’n mortid hwedhys owth omsedhi temmik, dell dybav - mes y fydh gans an skavskath tremen garow dhe dre, byttegyns. Hi a wra drehedhes syght an Norland yn skant kyns hanterdydh a-vorow - ha hwath ev a yll bos skantlowr moy es 190 po 200 mildir.
Gen 2. My re bassyas an jydh ma yn eghen a ekstasi y tybav y vos onpossybyl dh’y dheskrifa. Ow fascyon rag digowethder a yllas skantlowr bos leunhes yn tienna. Ny lavarav vy kontenya; rag my dhe grysi na vydhav kontentyes gan delit an par avel my a welas hedhyw ………… An gwyns a spavenhas a-dro dhe dardh dydh, hag erbynn an dohajydh an mor res eth yn-nansyn fisegel ….. Travyth dhe vos gwelys, hogen gans pellweler, mes keynvor hag ebron, gans golan drewythus.
Gen 3. Jorna hebask avel an bedh der an jydh. War-tu ha’n gorthugher, an mor a hevelis gweder yn feur. Nebes gommon a dheuth yn syght; mes dres an re na travyth yn porres dres an jydh oll - na hogen an bianna dyjyn a gloud. …… My a gevanedhas ow honan yn unn rosya’n golowji … Onan pur ughel yw - avel my a drov dhe’m kost vy pan vo res dhymm yskynna y rysyow dibenn - na hwath 160 tros-hys, my a dal leverel, a’n merk dowr isel dhe dopp an lugarn. A’n goles a-bervedh y’n shafta, byttegyns, yma’n pellder bys dhe’n barr 180 tros-hys dhe’n lyha: - ytho yma’n leur 20 tros-hys a-is dhe arenep an mor, hogen dhe mortid isel ….. Ev a hevel dhymm y tal pervedh kow dhe’m goles bos leunhes gans menweyth soled. Heb dout an dra gowal a via rendrys salowwa ytho: - mes yn-kever pyth yth esov vy ow tybi? Strethur kepar ha homma yw salow luck yn-dann neb kesstudh. My a dal omglowes diogel ynni dres an ferssa gorwyns a goneras byth - ha hwath my re glowas marners yn unn leverel treweythyow, gans gwyns dhe Soth-West, bos an mor aswonys dhe bonya ughella omma es yn neb tyller, an unsel namm yw ygeryans west Mor Kul an Magellan. Mor sempel vyth, byttegyns, a alsa kollenwel neb tra gans an fos rivettys hornsoled ma - usi, dhe 50 tros-hys a’n merk dowr ughel, nebes peswar tros-hys hy thewder, mar unn veusva …….. An fondacyon mayth esedh an sterthur warnodho a hevel krey dhymm .…..
Gen 4.
[.... Diwedh darn an dornskrif.]
Comments
Post a Comment