An Eghen Gothek

Nebes ahanowgh a alsa godhvos bos da genev an "Eghen Gothek" - Da yw genev drehevyansow, dillas, ilow, drollow ha poubtra a-dro dhe'n eghen 'ma (mes ny dhyskis vy an yeth Gothek hwath).

Unn pyth gothek eus pur dha genev yw bardhonek "An Vran Vras" (The Raven) gans Edgar Allan Poe. My re assayas dh'y dreylya dhe Gernowek lieskweyth, mes y'n gwettha prys my re fyllas pub assay my re'n gwrug. - My a dhalathas versyon nowyth myttin 'ma, mes re dhrog o ev, ytho my a'n dileas.

Mes ny vynnis vy bos fethys an dro 'ma, ytho my a dreylyas linen a vri dhyworto.

Ow versyon Kernowek: Down y'n tewlder 'na ow mires, hir sevis 'na, owth omwovyn, ania, toutya, ow hunrosa avel marwel na hunros'sa bythkweth kens.

An gwreydhek: Deep into that darkness peering, long I stood there, wondering, fearing, doubting, dreaming dreams no mortal ever dared to dream before.

Ha my a dyb y vos tybyans da dhe gowsel yn kever fatel ha prag treylis vy an linen verr homm.

Yn kensa, ottomma treylyans Sowsnek ger rag ger a'w Hernowek.

"Down in that darkness looking, long I stood there, wondering, worrying, doubting, dreaming like a mortal who hadn't dreamed ever before."

Yma nebes pythow haval dhe'n gwreydhek ha nebes dihaval orto.

Kensa darn an vreus yw yn ewn haval. An unn pyth esa res dhymm y janjya o "peering" dhe "looking" awos ny yllis vy trovya ger gwiw Kernowek ragdho.

Y hyllis vy gwitha an nessa darn avel y'n Sowsnek, mes wosa henna yth esa problemys dhymm. Rag dhe witha fros an bardhonek, res o dhymm oberi gans rewlys gramasek Kernowek. 

Ni a wor may hwer an didorr Kernowek gans "ow(th)", mes ow ri "ow" a-dherag dhe pub ger re vynnsa destrui an resyas. Meur ras dhe dreylyansow kessonen, y hyllis vy menya an "ow" ha'n didorr yn le y dhevnydhya pub tro. Ytho yma "owth" a-dherag dhe "omwovyn", nyns eus res dhe dreylya "ania", an D yn "doutya" eth hag o "(ow) toutya" ha nyns esa res dhe dreylya "hunrosa". Res o dhymm chynjya an ger "fearing" dhe "worrying" awos nyns esa saw unn ger rag "to fear/to doubt" - doutya, ha res o dhymm y dhevnydhya rag "doubting".

An darn diwettha o problem aral dh'y dreylya. An Kernowek rag "dreaming dreams no mortal ever dared to dream before" yw neppyth avel "ow hunrosa hunrosow na vedhas marwel hunrosa bythkweth kens" - mes hemma a vynnsa shyndya an resyas keffrys. 

My a wayt may hyllowgh gweles hag onderstondya ow fordh a dreylya tamm moy lemmyn, hag avel pub prys, na vernewgh ow Hernowek yn re arow.