Skip to main content

Kothman a welav


An loor a sedh
Yn an tir le mayth esov ow rosya, 
kothman a welav nag aswonnav 
a worwedh heb movya. 
Y galmynsi koynt a verkyav
yn-dann an bora krev.

Ankow y'n gwels.
Harow! Kyns an jydh dhe vones skwith. 
Ow leuv a ystynnav yn y du, 
mes dhymm ny dhehwel vyth.
Y kwaytyav mes nyns yw
Hag y hwortav rag pols.

Neshe a wra
Enep a vans y'n dor hag avon.
Dewlagas a lagatt heb gweles,
ow herth po kerth estron?
Byttegyns furv y'n pri yw gesys,
Olow troos avel kragh.

Ha der an hwenn
Darnow a'n kothman a-ves a'n bedh
a elow dhymmov a nes ha pell.
Ogas ha'ga diwedh,
eskern horn a vinhwarth yn fell.
Ny dalvia gul gwen.

Ankow a hol
Koweth dienev hir tremenys,
devnydh a fyllas yn y vewnans,
govenek o kellys.
Pubtra an keth yn y vernans
hag ow kortos yn toll.

Hag ystynn leuv
Hag yn ow dorn vy ny dheu bythkweth
hag y leuv dhigneus na drovyav vy.
Kontron a dhyber hwath
oll a wort, dhorta va ny fi.
Avello byth ny veuv.

Koskys y'n Gwav
Y preyn, kyn fo gweladow mes dall,
kothman a welav nag aswonnav.
Ow thenkys gehaval,
gwelys; merwel ha vansya 'wrav.
Ha dhe-ves y ponyav. 

Ankow a'm hol.





Comments

  1. Manawydan18 December 2019 at 08:56

    Hou! Pur dha yw genev dha gan: ma va orth ow hofhe a hunlevow a veu genev. Pana vusur yw hi? Po a wrussta hy dysmygya dha honan?
    My a scrifas eglynow souder (englynion milwr y'n Kembrek?) nanj yw seythen: https://linusband.wordpress.com/2019/12/13/an-niwl/
    My a dhalethas scrifa taclow war ow blog ow honan arta. Yth esov owth assaya y wul pub dy' Gwener. Nebes cotta yw ow scrifow, byttegens xD
    (Ryb an fordh: happ didheurek yw yn-wedh ni agan dew dhe dhevnydhya skeusen niwl war agan bloggys.)

    ReplyDelete

Post a Comment

Popular posts from this blog

MiSkriBa 2024 - 11 / 04 - Dy' Yow

Rag  #MiSkriBa  11 yma res skrifa bardhonek unlinen. For   #NaPoWriMo  11 we have to write a monostich, a one line poem. Dy' Yow An petal finek re godhas a'n lester flourys, ow koska yn hwell agesov. Thursday The final petal has fallen from the vase, sleeping better than I.
Post a Comment
Read more

An Jydh Finek

Ottomma treylyans a romans Kembrek Y Dydd Olaf gans Owain Owain, esa keffrys awen rag plassen 2014 a'n keth hanow  gans Gwenno . Deskrifans:   An drolla a hol den henwys Mark dre rannow a'y dhydhlyvrow ha lytherow a recevas ganso dres an 20ves kansvledhen ha Konsel an Brederedh, governans kepar ha broder bras, ow mos ha bos moy powerus. An konsel ma a ynni tus dhe gowsel aga yeth fug dre dhevnydhya rayys studhhe a vynn Mark skapya anedha ha gweres orth diwedha'n termyn distopek ma a dheu. Kedhlow Pella: Y rer an romans ma heb kost war furv e-Lyver. Y hwodhor gras dhe deylu Owain Owain a asa y dreylya ha'y dhyllo yn Kernowek. Y hyllir redya'n romans ma y'n restren dackyes a-is, po y iskarga avel PDF po EPUB dh'y redya war redyor e-lyvrow. Ynwedh, y komprehendir kevren dhe'n romans Kembrek derowel. Iskarga: An Jydh Finek - PDF An Jydh Finek - ePub Y Dydd Olaf
Post a Comment
Read more

MiSkriBa 2024 - 14 / 04 - Luck

 Rag #MiSkriBa 14, res yw skrifa bardhonek a dheg linen po moy a dhalleth gen an keth ger. Awen an darn ma yw an levow bian a er y'm penn ha my owth assaya bos person gwir... For #NaPoWriMo 14, we have been asked to write a poem of ten or more lines beginning with the same word. The inspiration for this poem are the little voices that babble in my head as I'm trying to be a real human... Luck Mar kalsen vy, yth evsen vy ow 'nafas yr heb y ankevi'n yeyn ha'y drefya dhe'n new. Mar kalsen vy, y fynnsen gorra'n golgh yn-mes kyns an glaw dhe dhos ha dampnya'n hav. Mar kalsen vy, y hworfennsen oll a'n ober chi dhe hebaskhe ow brys a bub preder. Mar kalsen vy, y kavsen hansel yagh dhe nerthe ow horf gen dader bara glas koth. Mar kalsen vy, y hylsen ponya pub dydh dhe-ves a dhelitys bewnans ha mos ha bos Adnois gay. Mar halsen vy, yth omglowsen yn ta despit dhe'n reden klappya a grav orth ow dewlin. Mar kalsen vy, y kowssen yn tiskwith dhe stoppya ow t...
1 comment
Read more