Skip to main content

MiSkriBa 2024 - 04 / 04 An Nans Mayth Yw Mo Mernans

 Prompt an bardhonek hedhyw yw kemeres titel po neb yeth/tybyans a-dhyworth lyver The Strangest Things in the World gen Thomas R. Henry (dyllys in 1958). Rag hemma my a dhewisas chaptra henwys The Valley Where Dusk is Death war folen 105, a-dro dhe gleves anella a blag peub a gosk yn arenebedh certan yn menydhyow Peru - kawsys gen kelyon tewes a gar an dises verruga. 

Yma'n bardhonek a-dro dhe garoryon a wodrig orth an arenebedh ma ha wosa spena'n nos war-barth ena, i a gach verruga. An karer a verow mes an penn gnas a dreusvew, ow hwansa bos gen y velder unweyth arta...

An Nans Mayth Yw Mo Mernans The Valley Where Dusk is Death

Ev re beu jorna hir, a garer,
Hag odhom a'gan beus
A bowes yn-mysk an kerrek hir.
Re drevesikkyn an bolgh ynn ma
Ha ranna yn kres an skeusow ygor.
Deus genev dhe'm tylda, a velder,
Ha nyni ow sevel orth an howlsedhes
Hag yn-dann gana lewlow a gress
Klowes galow ughel agan longyans.
Y'n gwynnder skrijus re ankeffyn
Lughesen dewes a'gan distemper
Rag erbynn an bora y fydhyn dianal
Ha kodha yn lowen a dhivregh an aral.
Dydh wosa dydh y hwansyn dehweles
Dhe'n nos mayth esen ni bew
A-ugh dhe gomol menydhyow an dyghow
Ha'n skeusow ow tos dhe vesies synsus.

Ev re beu bewnans hir, a garer,
Hag odhom a'm beus
A bowes yn-mysk ow hovyow pell.
Ny allav hogen gweles ow enep radell
Heb trovya dha vejeth degys y'm lagas.
Deus genev dhe'm tyller forsakyes, a gerensa,
May fia agan brassa lowena,
May hwortav yn di-wolow an jydh.
Y hwortav mes gyllys os jy prest
Yn istori terrys war lerghow an mena
Hag a'm tenn vy delergh nos wosa nos
Dhe'n termyn mayth esen ni bew.
Stag ov avel gwandrer honan, a darosvan,
Heb bos blesys gen diwweus hwansus,
Heb bos klevesys gen odhom di-hwyth,
Heb bos synsys gen byrlans finek.
Y rosyav yn tigoweth, ow kortos ragos. 


Labels:

Comments

  1. Niwlen Ster4 April 2024 at 15:59

    Yma dasson pur dha y'n bardhonek ma, my a'n kar. Ha "Ny allav hogen gweles ow enep radell /
    Heb trovya dha vejeth degys y'm lagas." yw marthys genev. Ober splann!

    ReplyDelete
    Replies
    1. Sam Brown4 April 2024 at 16:06

      Meur ras! My a vynnas gul dastewynnyans a neb par y'n nessa rann. Mes y hevel dhymm bos rann gresek dhe'n bardhonek ma na skrifis vy hedhyw, po martesen y vos re lythrennek 😬

      Delete
    2. Niwlen Ster4 April 2024 at 16:12

      Ogh, ny wonn vy, pur dha yw genev y vos yn diw rann, kepar ha dew dhen an kopel, ha gans sens a gyns hag a-wosa, wosta?

      Delete

Post a Comment

Popular posts from this blog

MiSkriBa 2026 - An tressa rann

  Yow oll,   Ottomma ow thressa kuntel a vardhonogow rag MiSkriBa 2026! Here are my third set of poems for NaPoWriMo 2026!  (sorry, there aren't any translations yet, I've been a bit busy). Dydh Mergher, an pymthegves a vis Ebrel 2026  Wednesday, the fifteenth of April 2026 Prompt -  Eskerdh a-dro dhe'n stock  / Expedition around the base (Poetry Society) Bewnans anweladow Yn gis an asfalt nowydh A glowir der an veister.  Chiow kroglennow deges Ow mires yn kas orth tremenysi Dell welir yn an mirour.  Arghow gorheryow lows A glapp dydh aral kellys A nakevir prys wosa prys.  Kan jynn karr ha ronk kyttrin A rol yn loos dre dermyn Na niverir vel viajys gwir.  Gwedrow ster a wel an loor Yn goos seudhelyow divegh Dell dhonsir garrow trist.  Ke prennyer dur a wra milva A vys breek istori A holir gen bewnans anweladow.      Dydh Yow, an hwetegves a vis Ebrel 2026  Thursday, the sixteenth of April 2026 Prompt -  Desk...
Post a Comment
Read more

Arvwisk Trevithick

 Ha hedhyw Dydh Trevithick , my a vynnas skrifa neppyth tamm koynt yn solempnyans anodho. Ytho otta bardhonek hag a wra henna (dell waytyav). Ynwedh yth yw prompt #MiSkriBa 25 gen an Poetry Society. As today is Trevithick Day , I wanted to write something a little strange in celebration. So here's a poem that (i hope) does just that. Also it's prompt 25 of #NaPoWriMo from the Poetry Society.   Arvwisk Trevithick Yn y hwelji unweyth moy ow tybri glow ha mortholya mog, yma Trevithick ow pyldya arvwisk ethen. Hatt chymbla a goner gen toll du a gollenk dens prennyer plat ha troyllya yn resyas ilow y honan. Klapp  ha jynn ganow gen keher dur a dremen gonyow, ha lyftya'n mor, hag eva'n kledher. Garrow horn a gesun gen kig, eskern ryvytys. Payn pell  osow kellys yn hebaskans. Goos a lamm dre bibow lettyes yn omsettyans skruth gwaskedh kressyes, hag ow gwaskedh a dhever skruth. An arvwisk a dhewis an lergh, istori krackyes mes kempen, ow ...
Post a Comment
Read more

Dha Jayr

 Termyn hir heb postya meur obma (dell yw usys). Otta bardhonek nowyth a-dro dhe'm tas-gwydn ha'y jayr leska barrednow koth hag yw genev lebmyn. Mar mydnowgh redya moy genev yn fenowggha, my a bost bardhonogow kott war BlueSky yn tabm moy usadow. Been a while without posting here (tell me something new). Here's a short poem about my grandad and his wicker rocking chair that I now have. If you'd like to read more of my work more often, I post short poems on  BlueSky  slightly more regularly. Dha Jayr  Ty a asas legaci, Moy es hanow Po gnasow bejeth, Moy es linen goos Po drolla hwarvosek: Neppyth a-dro dhe jynnow-myji Ha'n gwithans tre.  Ty a'm gasas, Ha'm tas, Ha'm breder. Ty a asas kovyow A viajys tren dhe vys an puskes, A isyow gols dehen brill, A vosow Sul. Ty a asas legaci Ha chayr Hag ynno mayth esedhav Ha tybi ahanas Pub dydh. Your Chair You left a legacy, More than a name Or facial features, More than a bloodline Or the incidental droll: Something ...
Post a Comment
Read more