Stera

Ow skath vian a lesk pan av dhe dhowr

Angompes war donnow hebask an lynn
Yn-dann howlsplann an dohajydh owr
Ottomma dalleth an oberen.

An roos a synsav a-ugh dhe'm penn
Ow lagatta yn-bann, orth an howlsedhes.
Ow kortos yth esov an kensa steren
Ha'n hwans a wrav wosa hy gweles.

Mes moy es henna usi y'm brys
Ny vynnav vy gasa an pols dhe vones
Y witha bys vykken, an gwella prys,
Ha gul dhodho bos rann a'm bones.

Y mirav, ow kortos, ow dewdhorn strooth,
An dyjyn kann a dheu, mes p'eur yw an govyn.
Pan y’n gwelir res yw movya yn tooth,
Ha'y gavos genev a-dhyworth an ebron.

Gwyns skentel a hweth yn tistowgh
hag owth aswon ow thowl y kelow kommol
A dheu yn tidro hag an glaw a wra plowgh
Hag arenep an dowr ow lemmel.

An niwl a sedh hag an roos a godh
ow fyllel y amkan a neuvell a-ugh.
Ha govyn a wrav a-dhyworth ple teuth?
An kloud a worher an logh.

Lies nosweyth omma re beu an keth
ow tira gans baskettys disawgh.
Byttegyns y'm kolon y klowav meth
gans tybyansow ow resek yn fenowgh.

Y synsav an rev ha's ri y'n donn
owth assaya dehweles dhe'n tir may tallethis
hag an nos a'm dallhi, a'm tenna dh’y bronn
kelgh avel kreyth kel yw genev gwrys.

Wor'tiwedh yn skwith y tov dhe'n lann
Ow horf na yll gwaya pella namoy
hag an rayys a dregh an kommol kann
an ster re skapyas yn tiassay.