Neb Termyn

Yth o neb termyn wosa hanter-nos ha kler ha tomm o an duder havek. Nyns esa’n gwyns ow hwetha hag an unsel sonow a glowas o an bughes ha deves yn gwelyow an komm ha grow an bownderyow yn unn dhensel yn-dann agan treys. Honan en ni. Ny allav vy displegya yn poran an chanjyow a welir orth rosya tylleryow bew ha peub ow koska. Parkow kerri gwag, darasow alhwedhys, fenestri du, golowysi stret ow payntya'n bys gans rudhvelyn fug a hevel yfarn yn imach flogh, pub gwighal ow skrijya ha lamma y'n skovarn kepar ha dyowl ow hanasa hulla, hag a-ugh dhe bubtra an ster ow lagatta yn-nans orth agan difeyth perfydh. 

      Nyns o anvenowgh ni dhe vos yn-mes ow kerdhes yn ouryow byghan an nos, hemm o an gwella termyn dhe skapya a'n chi ha gweles an bys dre lagasow dyffrans. Yth o diwedhes pan ethen ni yn-mes a salowder an byldyans ha dalleth anella yrder an gorthjydh, leun a yntanans yoynkneth hag ow hwansa neppyth. Neppyth aral. An anusadow. Nyns esa medras po tyller arbennek mayth esen ni owth assaya y dhrehedhes, ny vynnson ni saw gasa'n chi ha gweles dhe ble y’gan kemeras agan treys. 

Hag agan treys ow hembronk an fordh, ni a gowsis yn-kever pub eghen a dra dhiboos, agan levow ow sevel orth aswon usyow usadow an termyn ma ha'gan hwerthin ow turya dhe-ves der an ayr kosel, ha heb y aswon ni a dhrehedhas garth-gwari an nessa treveglos. Hemm o ughelboynt pennseythennyow agan flogholeth nans yw pell: an astel-omborth, a via an gwella delit pan esa fleghes luck ena dhe asa lamm ughel a'n esedh brenn; an mergh-leska, leun a rossen y kansons i avel tenor gans anwos hag i ow kwaya; an fram-krambla bras, ughel ha soled, y vonden-leska o hir removyes ha'y slynk ynwedh. Ny wodhyen ni ple dhe dhalleth. Yth o pubtra kepar hag yn agan kovyow hweg ha ni a vynnas dasvewa henna oll. Prederans vyth a-dro dhe'n chiow a wrug fos keyn an garth ha'n teyluyow a-bervedh ynna. 

Yn kensa ni eth war-tu ha'n mergh-leska, mes ni a aswonas yn straft na via possybyl aga devnydhya, bledhynnyow a wosseni re settysa'n enevales prenn ha metol ha'ga bagha avel yn kestevyn uskis. An astel-omborth ytho. Y hwighas orth dalleth, yn apert nyns o mar gerys y'n jydh ma avel pan en ni fleghes leun a nerth, mes ni a vynnas an keth lamm bras, ha prag na? Y hwighas, hag ena yn-bann my eth. Bonk. Hag yn-nans my eth. Bonk. Hag arta hag arta an gwari ma eth yn-rag. Yn-bann. Bonk. Yn-nans. Bonk. Yn-bann. Bonk. Yn-nans. Bonk. Krack. An astel a blegyas yn annaturel gans krodhvol ha ni agan dew a dhroppyas temmik moy es usadow. Yth esa pubtra yn agan kever ow kothhe, ha nyni ynwedh. Agan treys a dochyas an leur ha powes y'n skomm glus gwedhyn medhel. Unweyth ev re bia skomm prenn, mes nyns o fleghes mar gales namoy. 

Wosa movya agan honan y'n lent a'n astel-omborth, nyns o terrys yn tien mes hi a viras trist, ni a dreylyas. Yth esa neb mil ow tasknias ogas dhe'n ke, mes nyns o gweladow. Ni a viras yn y du rag pols ha dhana dalleth y’n tu aral, dhe’n fram-krambla bras. An unsel tra esa hwath warnodho a-dhia'n termyn a-varr o'n peul-tan, ha nyns esa dhyn hwans a'y dhevnydhya ha kavos losk-gordochya. Py pynag ni a yskynnas an skeul lovan, esa glyb ha leun a gewni, dhe'n kay ughel a gynnikas vuys a'n arenebedh leel. 

An gwyns o kosel hwath. An kosow o bestes blewek koskus orth hav-hunya, an goverow kanus o gowfordhow pell dhe-ves ow kemeres tus a-dhyworth an le byghan ma, an breow pell o skeusow godrosus erbynn an nos. Anweladow saw erbynn an stersplann gwann. Hag a-ugh dhe hemma oll y sevis treuskorrell hir a dhanvonas imajys pellwolok ha sinellow radyow a-dreus dhe’n pow, hy fresens merkadow drefen an golowys rudh splann a bonyas yn-bann hy amalow dhe warnya traffik ayr hy bos ena. Treweythyow ni a gerdhas ena, war nosow kepar ha haneth. Ni a yllas gweles an bys oll a ven an tour tanow war an bann rond. Kastel an jydh hedhyw yn y fordh y honan.

Yth o splann war an kay ughel, ha ni a dhewisas stoppya gwari vael floghigow ha mires orth an ster ha’n bysow anwodrigys yn aga mysk, yn unn glappya hwath ha lowen ha hebask. Yth esen ni ow posa war an ke isel a bonyas a-dro dhe'n kay rag lettya fleghes a godha. Hag ow mires war-tu ha'n breow, an dreuskorrell yn kres agan syght, yth usas a-ugh dhyn ni.

Y teuth heb gwarnyans ha treghi der an goseleth. Agan pennow a dreylyas yn tistowgh, ow holya neb omworhemmyn ragdowlys, yn unn hwilas an efanvos oll rag devedhyans an son ma. Pes den re wrug an keth kyns? Neb spouk ow tenna merkyans oll heb y vynnes. An son a hevelis jett ow neyja yn isel, mes nyns esa’n tros gwaytyes po an keunys ow pos leskys po an krenans renkus a dheuth gans henna. Nyns esa travyth ena ha'n son a voydyas pell dhe-ves kesnell hag y teuth. Y’n pols na my a dybis y vos certan a vos jett, yth esa lies ayrbark luek a-dro hag ass o kler an nos, y hwrug sens i dhe dhevnydhya'n chons dhe dhyski lewyadoryon hag assaya jynnow-ebron nowyth. 

Ny verkyas an nos vyth ha’n keth a wrussyn ytho. Ni a viras orth an eyl y gila yn akord ha dalleth treylya delergh dhe'n breow ha'gan flowsa. Mes, orth omjersya, ni a'n klowas arta, an son. Ow holon a derlemmis ha dhana y sedhas. An dro ma y teuth a'n tu mayth eth mes war amal aral an komm, nebes pella, kepar hag y hwrug tro gowal kyns dehweles. 

Agan lagasow a assayas holya'n son, ow hwithra hag ow hwilas an playn sopposyes. My a synsas ow anal. Ny'n gwelson ni. Skant ny’n klowson ni. Yth esa ow movya war-tu ha'n est. Dhana ni a'n gwelas. Na'n jett na’n ayrslynkyer, naneyl gwrier an son koynt hanter jynnweythek. Mes rayys a wolow. Golowys plat, kepar hag yn gwari jynn-amontya a-varr ‘Pong', ow pos sethys orth an dreuskorrell a-dhyworth travyth hag an son orth hy fassya. An chayn a wolowys ow kotthe ha dhana ow vansya ha'n son o gyllys arta. 

Yn le es neb deg sekond a-dhia glowes an son wor’talleth y hwarvia oll. Ny wrug sens. 

Awel skav re dhallathsa hwetha agan gols ni, mes nyns o klowadow an del y'n koos hwath ha karr vyth esa ow lewya war an hensi byghan a-dro dhe'n leurnedh pell. Ni a vynnas dalleth kesomwovyn a-dro dhe'n hawrvos koynt ma, leun a gwestyons yth esen ni. Mes kyn ni dhe allos ygeri po min po ganow, ni a'n klowas arta. Nebes kepar ha tonn dibenn ow terri erbynn treth. Harth avlavar. Heb dalleth heb diwedh. Ow hanasa effeyth Doppler. Yth esa'n son ow tasdhehweles.

Ni a lettyas agan keskows didhalleth yn straft, ow koslowes gans rach a-ugh dhe'n enevales, a-ugh dhe'n gover byghan, a-ugh dhe'n del skav, an jynn taw a hwyppyas a-dreus dhe’n sonwedh y'n ebron, anweladow na fors py mar gales y fynnson ni mires. Kepar hag a-varra yth eth yn snell ha dhana treylya. Moy merkadow o an dro ma awos ni dh’y gwaytyas. Agan lagasow a vovyas yn frantek, parys gans nammow rudh an dreuskorrell yn syght. Arta an setha. Ow tones a dyller vyth y'n duder a-ugh. An rayys Ceefax gwynn ow kotthe orth skwattya'n peul war an vre yn kres an nos. An bora hwath ouryow dhe-ves ha trigoryon an gwigow yn aga gweliow oll. 

Dhana yth eth. An son ha'n golowys koynt. An nos a dhehwelas dh'y studh usadow ha'n nos eth yn-rag ow chasya'n jydh a dheu. 

Ni a wortas rag termyn, yn unn waytyas y tehwelsa'n dra, yn unn waytyas yth omdhiskwedhsa'n dra. Ger vyth eth yntredhon ni rag spys hir. Yth esen ni ow checkya bos an ster yn aga ordenans gwir, bos jynnow-ebron trethysi ha gwara hwath ow pesya dre vor digloud an ayr. Yth o pubtra an keth hag y hevelis nag esa saw nyni re janjsa. Awos pyth?

Ni a dhiyskynnas a'n kay ughel yn lent, talyow herdhyes yn-bann. Mar angrysadow o, nyns esa dhyn dewis saw assaya y weles, assaya y glowes. Nyns esa ena. 

Hag ow kerdhes dhe-dre ny gowsson ni yn-kever travyth. Nyns esa saw omwovyn. Pyth o? Ayren governans ow kul prov war doulys darlesa poblek? Kasor stelth a dramor owth assaya ladra kedhlow hag aswonvos? Taran skav ha lughes pel a neb eghen revedh? Ni eth der an rol oll lieskweyth yn agan pennow, ha lieskweyth ny drovson ni gorthyp fur. 

Heb gasa agan brysyow, ni re dhrehedhsa'n chi arta. Ni a hedhas a-dherag dhe’n daras, leuv ow synsi’n dornla seulabrys. Ni a wodhya der entra’n chi y tegesa’n chaptra, y kellsa’n saga, ha ny’n leveris arta namoy. O gwir? A via’n gwir trovadow? Eus dhe’n gwir poynt pan eksist an fantasi? Ny varnyas. Res o pesya. Ni eth a-ji yn lent hag yn tison, unn wolok finek dres an skoodh, an ebron o kler ha’n awel isel, pubtra o taw. Ni a gammas der an dreksel ha dasomjunya gans an bys gwir, usyow degemeradow ow tehweles dhyn, ha’gan peghow gesys a-ves. Ny hwarva’n drolla ma, nag yn bys gwir po ewn.

Yth o neb termyn wosa 03:30 y'n myttin, ha’n bora o pell hwath.