An Wragh Wynn

Pan wrug hunya an jydh,

ha tawel o'n gwydh

pan o kosel golow an howlsplann

Y hwrug sevel an loor

avel lesyow a'n nor

ha ny veu klowys sonow tus mann

An Wragh Wynn wrug dalleth

yn-bann an vre yth eth

gans hy lorgh ha's krystal yn hy dorn

Passyas gluth yr an nos

war hy lergh olow tros

ow junya an goswik gans an sorn

Le mayth esa lagasow

'viras a'n tewolgow

a'n bobel na vynnas hy aswon

Ny wodhyens vyth oll

pandr'esa ow kul

gans hy gweder ha hy gwelen

Tewlys veu men byghan

onan wosa onan

ow helghya 'ga diskians dhe-ves

Hy anal oorhas tomm

hy hrystal avel plomm

a godhas yn tison y'n wlas

I a wrug pesya

bys nag esa meyn ena

Mes hy ladha na yllsons i vyth

Hi a welas an pegh

ha'y garyas 'vel begh

y'n dor y hwrug hi gwruthyl nyth

Kogh hy lagas welas

ha kerrek a's skwattyas

I re waynsa an kasow mar es

Y tehwelas an taw

tavas dison an maw

Y'n gwel na an dagrow erviras

Pana syght rag an ster

pana nos heb par

Ha ny omglowas an dus an meth

Y hwelsons hy sorr

ow sevel gans loor

Ow tiwosa hy honan y'n bedh

Hag y turyas an nos bys vykken

Ha hy enev na gepar ha steren