Dydh Kenedhlek Bardhonieth

Y skrifis an bardhonek ma rag Dydh Kenedhlek Bardhonieth 2018, nyns eus titel dhodho hwath.

Ty a dyb ty dhe aswon ow gwlas,
bro vian klys orth dha dreys.
Ty a dyb ty dhe's kara
hag ow krodhvolas yn-kever hy leys.

Ty a dyb y vos hy bewnans
dhe wortos yn lostow dibenn.
Ty a dyb na wel henn nagonan
hag ow lewya dres enep hy men.

Ty a dyb bos perfydh hy hewer
na wra glaw saw pan esos yn-ker'.
Ty a dyb bos an trethow marthus
hag ow kasa dha atal ha fler.

Ty a dyb bos splann an arvordir
le mayth usi an gwella treth.
Ty a dyb bos hager an menydh
ha'y istori usi 'vel kreyth.

Ty a dyb bos brav hy hobis
avel mones dhe'n mor gans rev.
Ty a dyb bos koynt hy hengovyow
hag ow lettya hy thavas ha lev.

Ty a dyb bos hegas hy fleghes
na wra ri wolkom dhis ta.
Ty a dyb ty dhe longya gansa
hag ow prena chi y'n vro ma.

Ty a dyb ty dhe aswon ow gwlas
bro vian klys orth dha dreys.
Mes yma hi kreffa agesos,
ha dha vratha a wra hy dreys.

Yma milvil a Gernowyon
a gar aga thir yn hlan
Ha gans melodi y'ga holon
yn krev ha prout i a gan!