Kesunyans

Kesunyans

An logel ma a dewes heyl le may rewlyas tus an lanow

na dhassen namoy dhe dheverans an dowrow

po skath-donn skav a skathow a dremen

an chambour gorhelys gans fawen.

Hen yetys dar yw remenant eskernek a'ga gallos kens,

aga ober na wrys a'ga diswrug ha'n leys

a arm dasson a'ga foder syger,

yn-dann an pons ha der an pyl yger.

Koselder a drig yn segh omma le mayth esa kan an karn

Lemmyn na gik na rogh jynn yw klowys dre'n spern.

ananiys saw gans golgh an ydhyn

ha movyans boghes a donn glawen.

An tewes kelmek a avlever an dager kamm a dhisliw

yn uskis dres arenep fug a dreyl dhe vlou,

y'n gormdra yn-dann vockas mirourys

a dhowrow kellys ha'ga spyrys.

Beghys yn strooth yw'n lergh ynter avonsyansow koth ha nowyth,

mes natur yw a bergheneg hy hen goweth,

gans hy gwels gwer gwentonnek yr y tregh

dredho avel tollow yn ben kough.

An menweyth anventenys a vrows ha bryckys growan a dreyl

delergh dhe gerrek y'n dor ha na fors pyneyl

gwaregow down py a wra mos yn fell

anbassadow dhe neb fros dre wall.

Y rosyns hwath a-dreus an dirwedh lyb ma a-dro dhe'n kamm ynn,

Hag y savons i orth aswon an bedh opyn

le may trigas unweyth kov lent an dowr

esa kulhes gans poos an oos owr.

Hag yn-mysk an linas ma yma pub eghen a remenans,

mes avel ol-troos ankevys yn pri an hyns,

nyns yns i saw kleudh anweladow dres

fenester na vynn aga gweles.

An termyn trosek diskians a dheu ha passya dha wolok

hedre gri dha henwyn hewel taw truedhek

ha mil lagas py a lagatt ortys

a'th hwel ta heb godhvos dha vones.

Mes y hwonn vy.