Bughes

Bughes

Wosa an viaj hir y fynnas Luke mos rag kerdh dhe-ves a'n dreveglos. Kas o ganso an powdir. Yth o re dewal ha nyns o nevra sinell luck war y gonnyk-kodh. Ha'n blas! Ass o kas ganso va blas an le ma; mon ha glos. Mes ev re ambossa dy' golyow dh'y wreg wosa ev dhe oberi dres lies pennseythen ha hwarvos aral. Heb mar, ny via owth oberi. Mes gwell o ganso leverel gowyow orth Rachel es an gwiryonedh y vos ow kavos negys karnal gans y dharbarores. Hi re welsa nebes messajys war y gonnyk-kodh, Rachel, mes yth o moy po le certan na'ga onderstondsa.

       I re dhothya an nos kyns hag a-dhia nena ny wrug ev receva tekst po Whatsapp mann dhyworth Claire po nagonan aral a'n bys gwir gans henna. Ev a leveris dh'y wreg bos hwans dhodho rosya ha gweles an dirwedh. Temmik yn-mes a'y nas o hemma, byttegyns ev re wonedhsa'n has der an seythen gyns y vos yntanys dhe assaya hobis nowyth, avel kerdhes ha rosya, ha gul an gwella a'n desedhans anaswonnys. Henn a vynnsa displegya y omdhegans nowyth koynt ha ny wrussa hi desevos an seks kudh mar kwaria va gans rach.

       Ev a dhiberthas an chi. A-dhesempis wosa'n diwettha fenester dhe vansya a'y wel, ev a rabalyas y bellgowser ha'y lonchya y'n ayr hag ow kerdhes. Ev a dhuryas dhe wul hemma orth gwandra a-hys an bownderyow kul, owth assaya avodya an leys ha'n busel a worheras enep an fordh. Yth esa va ow kwiska y gostekka eskisyow ledher Italek nowyth dhyworth Selfridges ha ny vynnas an le kawgh ma dh'aga distrui. Martesen y talvia gwiska nebes botas glus gwedhyn. Ev a dheuth dhe yet metol plos esa tackyas gans korden rudhvelyn koth. Y glappkodh a grenas hag a senis ha'n messajys oll ow trehedhes an devis du byghan. Ev a stoppyas omma ha posa war an yet, wosa y skubya glan gans y gweth-bocket. Ev a worthebis an messajys onan hag onan, hag yth ordenas y nessa vetyans gans Claire, an nos i dhe dhones tre.

       Y treylyas dhe enebi an gwel a-dhelergh dhodho. Nyns o pur vras hag an gwels o gell awos an pri tew re bia kickyes yn-mes gans enevales poos. Nyns o saw unn vugh ena, gownagh goth. Ev a's kasas yn hware. Ny wodhya prag, mes y hwrug. Best kasadow ha mostedhes o. Ev a lagattas an kroadur y'n gwel; yth o plos, flerys ha mosek. Nyns o da rag travyth es brewgik ha henn a via breyn pur. An best ma o metafor perfydh rag an powdir; splann dh'y bassya war viaj hir war an worfordh ha sevel orth y aswon, mes oll yn oll hepken neppyth dhe brovia rag an citas posek. Piw a vynnsa triga omma gans dewis?

       Y turyas dhe's gweles rag hir, owth ankevi le mayth esa va, y'n wlas a gasas ha'n jdyh ow kotthe pella. Yth esa neppyth yn hy hever, an vugh na. Neppyth kamm. Neppyth a dheuth dhodho yn lent avel sevel an howl war vyttin gwavek. Y golon a dhallathas resek. Yth esa'n vugh ow lagatta war-dhelergh orto yn tison. Na. Nag orto. Ynno. Yth esa's dewlagas ow mires a-berth yn y enev, der y lagasow, a-dreus dhe'n gwel. Lagas yn lagas, ny wrug ev merkya. Ny wrug ev merkya bos an vugh ow lapya hy diwweus.

       Y gonnyk-kodh a senis yn ughel dhyworth y bocket. An kestav-lagas veu terrys ha'n vugh a bonyas dhe-ves. An hus o terrys. Ev a hesbaskhas temmik ha treylya yn marth, owth assaya konvedhes pandr'a hwarvia y'n pols na. Y tallathas war an kerdh delergh war-tu ha'n chi rentys. Mes yth esa res dhodho stoppya. Ev a sevis war vleynyow y dreys yn unn assaya mires a-dreus dhe'n keow dhe'n gwelyow yn y gever. A bandr'a welas yth esa pub onan leun a vughes hag yth esa pub bugh ow heveli dhe lagatta orto yn tison y'n keth fordh ha'n wownaghes goynt. Tavosow ow tochya tronnow ha gweusyow medhel. Ev a snellhas y gammow, mes y klowas an lagasow orth y holya avel lew parys dhe lamma. Ughel yn aga hoselder. Py pynag esa ow tarvos, ny vynnas godhvos.

        Y dhewlagas a flyckyas dhe doll y'n ke. An enevales a dhallathas movya war-tu ha'n yetys, pub onan anedha veu tackyes gans korden a neb liw: rudhvelyn, kogh, glas. An kensa bugh dhe dhrehedhes hy yet a's ygeris heb odhom nerth. An kroaduryon gwyls aga omdhegans a diveras dhe'n bownderyow ynn yn snell ha resek war-tu ha va. Yn skon i re'n drehedhsa. Karnow ow tones yn-nans warnodho yn poos, anal tomm ow pothhe y gneus. Y'n decken ma y tyskas Luke yn uskis pandr'esa ow hwarvos dhodho. Dhe'n bys. An lagasow gwag a'n neshas, nown prisner famyes yn pub onan, tavosow ow plasa'n ayr a-dherag dh'y vejeth. Ev a hanasas yn isel yn-dann y anal hag ev ow taskor, nyns esa poynt assaya skapya. Pubtra re janjsa. Y tassenis bedhyglans gwag oll a-dro dhodho.  

       Ogh, ass o kas ganso an powdir.