Kravlostow (Knockers)

In Cornish Only, use the links below to learn more about Knockers in English.

Kravlostow, Knouckyers po Knockers (yn Sowsnek) yw eghen a dus byghan usi trigys yn-dann an dor yn balyow Kernow. Leverys yw gans nebes pobel aga bos spyrysyon Edhewon esa danvenys dhe oberi y'n blayow sten avel kethyon gans an Romanyon ha ny'ga klowir owth oberi war dhydhyow Sadorn po golyow Edhowek erel. Trovyes yw an Kravlostow awos aga hana ha'ga bonkya. Tus bal a dyb bos an sonow ma arwodh a jons da awos wosa i dhe vos klowys, trovyes yw beghow a voon da. Mars yw golow splann gwelys war nivelyow koth an bal, certan yw y fydh moon da trovyes ena ynwedh.

Pur hager yw Kravlostow, avel Spyryjyon, hag i a yll bos pur fell, mar nyns ymons dyghtyes yn ta. Hengov yw rag tus bal dhe ri kresten aga hwiogennow dhe'n gravlostow. Hogen hwibana a yll aga divlasa!

Yma drolla yn-kever den henwys Tom Trevorrow a leveris dhe'n gravlostow hag ev owth aga klowes: "bedhewgh tawel ha kewgh." Wosa hemma, kowas a veyn a godhas warnodho, ha gorra own dhodho. Nyns o shyndys hag ev a ankovas yn-kever an hwarvos. Nebes dydhyow diwettha, hag ev ow tybri, ev a glowas levow byghan ow chantya:

"Tom Trevorrow, Tom Trevorrow,

Gas nebes Fuggen rag an Bocka

poken y teu anfeus dhis avorow!"

Byttegyns, Tom a dhybras y voos oll. Wosa hemma, an gravlostow a janyas aga han:

"Tommi Trevorrow, Tommi Trevorrow,

Y tanvonyn anfeus dhis avorow;

Ty foul koth a dhybras dha fuggen oll,

ha na as temmik rag an Bocka."

Y feus a wethhas hag yth esa res dhodho gasa'n bal.

Yma hwedhel aral a lever bos Kravlostow spyrysyon tus bal marow a vonk war fosow an bal dhe warnya yn-kever peryl a dheu. Darn finek hwiogen kroust an dus bal, an talben dell yw usys, yw res dhe'n gravlostow rag aga grassa rag an gwarnyansow - Hemm yw an drolla esa dyskys dhymm y'n kensa skol. Versyon aral a hemm a lever fatel wra'n Gravlostow an droglammow (yn le gwarnya y'ga hever) ha res yw'n boos dhedha rag gwitha aga lowena.

Kemerys a veu hwedhel an Gravlostow dhe'n Statys Unys gans an Kenderow-Jackys hag yma drolla a-dhyworth an 1950ow a val ow pos gesys ygerys rag seythen wosa ev dhe dhegea rag gasa dhe'n Gravlostow diberth ha mos dhe val aral. Byttegyns, yn Kernow, krysys yw bos an Gravlostow ow pesya dhe driga yn-dann an dor, yn downderow an balyow koth, yn arbennik yn-dann an Gonyow. Martesen hemm yw acheson an diskraow oll yn arenebedhow balweyth koth - an Gravlostow a vynn aga rydhsys?

_____

Ottomma fylm kott a awenas gans hwedhel an Gravlostow.

Pennfentynnyow:

• Courtney, M.A. 1989. Folklore & legends of Cornwall. Karesk: Wheaton. Ff.128-129
• Wikipedya
• Mysterious Britain
• SpookyIsles
• Mythology Wiki