Fleghes an Loor

Yth o nos tawel, pan splannas an loor, 
ha koskas trigoryon ryb tenewen an mor. 
An gath a wrug helghya ha'n bobel yn kosk, 
gans mog yn an chymblys a'n tan ha'y losk. 
Dison ha hebask, nyns o travyth kamm,
mes y'n pelder y hwelas unn den a wrug lamm'. 
Yn y dhorn esa kalter, leun a gorev mar splann, 
y'n aral esa browsyon na dylis mann. 
Mes orth y holya, avel deves dhe'n gwel 
esa fleghes an chiow ow leverel farwel. 
I a vynnas an korev ha'n browsyon byghan, 
i a holyas an den a hwyrnas neb kan. 
Ny wodhyens an gwirder, gow o oll an kows, 
mes 'korthebsons y eryow gans klappya ha flows. 
"Ple'th esos ow mones gans dha gan mar hweg?" 
- "Dhe bow agas hunros yth en, fleghes teg." 
Mes avel pub ger a skapyas y vin, 
gow peryllus o hemm kepar ha'y win. 
Ytho der an nos y kerdhsons i oll, 
ow kana ha flowsa, yn-nans bys dhe'n poll. 
Ha pan dheuth an bora ha golow an jydh, 
marow o pub flogh; an dowr o'gas bedh.