An open letter to Sheryll Murray, MP for South East Cornwall, in Cornish.

Lyther ygor dhe Sheryll Murray, Esel Senedh (E.S.) rag Kernow Soth-Est.

A Sheryll Murray ker,

• Yn kensa, nyns esov vy ow kowsel a-barth an gemeneth Gernowegoryon, mes avel burjes a'gas pastel vro.

• Yn nessa, nyns ov vy an eghen a berson, neb a skrif lythrow dhe bolitegoryon dell yw usys. Gwell yw genev gwitha ow gwelyow politek dh'ow honan, wel, gwell O genev.

Ev re dheuth dh'ow attendyans y hwasksowgh hwi erbyn an arghasans rag an yeth Kernowek, ha my a vynn leverel orthowgh ow bos diswaytys. My a wor bos dhe'n Parti Gwithyasel yn Westminster neppyth erbyn an minorytys Bretenek, mes my a dybis y fiewgh hwi war amal agas pastel vro. - Da lowr, nyns yw Kernow Soth-Est an le mogha Kernowek y'n dhuketh, mes a nag yw hemma an poynt? Res yw dhyn gul neppyth dhe weres tevyans an wonisogeth Gernow y'n arenebedh leel, ha'n yeth Kernowek yw fordh pur dha a wul hemma.

Gans treylya henwyn stretys hag arwodhyow dhe’n Kernowek, yth eson ni ow tiskwedhes bos Kernow Soth-Est rann bosek a Gernow gowal. Y hyllir devnydhya an yeth dhe denna havysi dh'agan trethow, dhe'n ugheldiryow ha dhe'n woon. Gans dyski an yeth dhe fleghes ha tevesigyon kehaval, y hyllir maga gooth yn Kernowekter ha ri ober dhe dhyskadoryon po an daffar dh'aga gweres dhe'n lyha.

Ges ywa bos res dhe Gonsel Kernow gul oll an re ma ha lower moy rag an yeth y'n dhuketh gowal gans £150,000 yn unnik. My a dyb y vos marthus y hyllir neb tra bos gwrys gans an myns ma vytholl.

Mes yth ov vy sur bos acheson da dhewgh yn-kever prag y hwasksowgh erbyn arghasans an yeth. Martesen hwi a dyb y hyllir devnydhya an arghans rag neppyth aral po gwell y'n arenebedh avel an drehevyans a jiow heb gwellhe gonisyow po isframweyth leel ha heb tybi a-dro dhe’n effeyth hemm a vynnsa kavos war bobel an bastel vro. Martesen hwi a vynn devnydhya an arghans y'n bankennow-boos awos an odhom ragdha re sevis meur ras a weres ha towlennans prederus an Governans Gwithyasel yn Westminster.

Prag na gemerewgh an arghans a-dhyworth an arghasans rag Trident?  Nyns yw £150,000 travyth  yn kehevelyans dhe'n bilyonow a beunsow eus gwastyes warnodho pub bledhen.

Heb mar, hwi a alsa devnydhya an arghans dhe weres gans agas kaskyrgh dha dhiberth an Unyans Europek. Yth esons i pur dhrog, nag yns? I a with agan ertach ha’n Kernowek ha ri milyonow a beunsow dhe negysyow kernowek. Mes ny vynnir hemma. Heb gwith an Unyans Europek, y fia ev essa lowr dhe dhistrui agan gonisogeth, ertach ha yeth rag may hyllir drehevel milyow a jiow na yll kernowyon na burjysi agas pastel vro affordya.

Ni a vynn govenek, honanieth ha kevarghow fur, na chiow nag arvow nuklerek.

Y fynnis vy gul travyth moy es diskwedhes ow diswaytyans y'n desedhans ma, ha my a dyb y hwruga vy hemm.

My a vynn leverel unn pyth moy. Yn despit dhe bubtra, ny yllir stoppya an yeth Kernowek. Ev a wra tevi ha mos ha bos kreffa awos bos pobel, neb a grys yndho ha'y nell! Ni a wra y dhyski, ni a wra y gowsel ha ny wren ni tewel!

Of course, you have not understood any of this as you would rather Cornwall had no voice of its own, let alone learn it yourself.

Meur ras bras a bubtra a wrussowgh hag esowgh ow kul rag yeth ow thre ha rann ow ertach.

Dhewgh hwi yn lel.